Ffermio a chefn gwlad
Hyrwyddo cymunedau gwledig cynaliadwy
Mae Llywodraeth y Cynulliad yn cefnogi’r cefn gwlad a chymunedau gwledig ac yn annog y gwaith o reoli amgylcheddau amaethyddol yn gynaliadwy.
Mae gwybodaeth fanwl am faterion gwledig ar gael yn ein cylchgrawn Gwlad sydd ar gael mewn print ac ar y wefan hon.
O dan Bolisi Amaethyddol Cyffredin y DU, rydym yn talu ffermwyr sy'n cadw eu tir mewn cyflwr amaethyddol da ac sy'n cydymffurfio â gofynion amgylcheddol a gofynion iechyd a lles y cyhoedd ac anifeiliaid. Mae Cynllun y Taliad Sengl yn cydredeg â rhaglen Tir Cymru, sy’n cynnwys Tir Cynnal, Tir Gofal a Thir Mynydd.
Cynllun Datblygu Gwledig Cymru 2007-2013
Cynllun Datblygu Gwledig 2007-2013 yw'r mecanwaith y bydd Llywodraeth Cynulliad Cymru yn ei ddefnyddio i gyflwyno'r gweithgareddau o dan Reoliad Datblygu Gwledig yr UE (EC 1698/2005). Wedi iddo gael ei gymeradwyo gan y Comisiwn Ewropeaidd, bydd y Cynllun Datblygu Gwledig yn sicrhau cyllid y Comisiwn Ewropeaidd o Gronfa Amaethyddol Ewrop ar gyfer Datblygu Gwledig, swm wedi'i neilltuo o Gronfeydd Strwythurol a derbyniadau o fodiwleiddio gorfodol.
Mae'n ddogfen bolisi strategol, felly nid yw'n cynnwys manylion gweithredu am y cynlluniau unigol fydd yn cael eu rhoi ar waith. Bydd y manylion hynny'n cael yng nghanllawiau'r cynllun sy'n cael eu datblygu ar hyn o bryd gyda rhanddeiliaid mewnol/allanol ac nad ydynt yn destun cadarnhad ffurfiol gan y Comisiwn.
Mae'r gweithgareddau a ganiateir dan y Cynllun Datblygu Gwledig fel a ganlyn:
- Echel 1 Cryfhau gallu'r sectorau amaeth a choedwigaeth i gystadlu;
- Echel 2 Gwella'r amgylchedd a chefn gwlad;
- Echel 3 Gwella ansawdd bywyd mewn ardaloedd gwledig ac annog arallgyfeirio yn yr economi wledig;
- Echel 4 Mabwysiadu dull gweithredu Leader ar gyfer adfywio cymunedol
Amcangyfrifir mai'r gwariant amcanol cyffredinol ar gyfer y Cynllun Datblygu Gwledig yw £795 miliwn yn y cyfnod 2007-2013, ac mae £195 miliwn ohono yn dod o'r UE. Bydd cyfraniad pellach o oddeutu £61 miliwn o Gronfa Amaethyddiaeth Ewrop ar gyfer Datblygu Gwledig yn cael ei greu dros y cyfnod fel derbyniadau drwy ddefnyddio modiwleiddio gwirfoddol newydd. Mae Llywodraeth Cynulliad Cymru yn cyfrannu tua £523 miliwn, sy'n cynnwys cydariannu £50 miliwn ar gyfer modiwleiddio gwirfoddol.